Nagtaas ang Philippine exports sang Enero 2026 sang 7.9% sa USD7.1 billion halin sa USD6.6 billion sang tinalikdan nga tuig nga nagrekord sang 13 ka-bulan nga tayuyon nga pagdabong, suno sa Philippine Statistics Authority (PSA).
Nagapabilin nga nagapanguna nga export ang electronic products nga nag-income sang masobra USD4 billion ukon 56.5% sang kabug-usan nga shipments. Ginsundan ini sang gold nga may USD488.8 million kag machinery & transport equipment nga may yara man sang USD383.2 million.
Sa kategorya, manufactured goods ang nagbug-os sa 79.3% sang exports, mineral products 10.3%, kag agro-based products 8.1%, kalakip ang preska nga saging kag desiccated coconut nga nagrekord sang mas mataas nga export bangud sa mabakod nga demand kag presyo.
Pinakadako nga export market sang pungsod ang United States (USD1.2 billion), ginsundan sang Hong Kong, Japan, China, kag South Korea. Suno sa Department of Trade and Industry (DTI), dako nga bulig sa pagdabong ang Free Trade Agreements kag iban pa nga trade deals nga nalab-ot sang Marcos Jr. administration.
Ginsiling naman ni Trade Secretary Cristina Roque nga pabaskugon pa ang performance pamaagi sang pagpalapad sang merkado, pagpakusog sang value chains, kag suporta sa mga exporter.
