ROXAS CITY – Ginahulat na lamang sang katapo sang Philippine Army ang mangin resulta sang imbestigasyon sang PNP natuhoy sa shooting incident nga nagluntad sa banwa sang Jamindan kun sa diin naulamid ang isa ka miyembro sang Philippine Army.
Sa interview sang Bombo Radyo kat Cpt. Kim Apitong, Spokesperson sang 12IB/3ID Phil. Army, ginpahayag sini nga magapatigayon man sila sang separado nga imbestigasyon agud mahibaluan ang posible nga silot nga ipangatubang sang suspetsado, apang suno diri pagarespetohon nila ang mangin resulta sang imbestigasyon sang PNP.
Ginsiling ni Apitong, wala ginatolerar sang ila organisasyon ang mga iligal kag indi maayo nga buluhaton sang ila miyembro, kag kun mapamatud-an nga may ginlapas ini, nagakadapat suno diri nga atubangod ang llayi.
Samtang, padayon suno diri ang imbestigasyon sa insidente kag ginapanugyan nga indi pag-unahan hukom si Sgt. Joemariel Vacaro nga amu ang nakaluthang sa kaugalingon man nga himata nga si Arnulfo Vacaro bangud man sa inisyal nga imbestigasyon nga aksidente ang natabo.
Ginkumpirmar man Capt. Apitong nga indi service firearm ang gingamit sang suspek nga calibre 357.
Luyag sini ipalab-ot nga indi tanan nga sundalo ang nagahimo sang kalainan kag kalabanan sa ila amu ang professional.,
Sa pihak nga bahin, nagpangabay na sang autopsy ang pamilya sang biktima.
