ROXAS CITY, CAPIZ -Nakared-alert status na ang Philippine Coast Guard-Capiz bangud sang Bagyo Tino.
Sa interview sang Bombo Radyo kay Senior Chief Petty Officer Arnel Nisola, Deputy Station Commander sang Philippine Coast Guard-Capiz, iya ginpahayag nga nakabantay na ang tanan nga katapo sang ila talatapan sa kadagatan sa palibot sang probinsya sang Capiz.
Suno kay Senior Chief Petty Officer Nisola, naka-deploy na ang 11 units ukon masobra sa 90 ka mga katapo sang talatapan nga magabantay sa tagsa-tagsa sini nga assigned area.
Pahayag pa niya, ginapahanumduman man ang mga gagmay nga sakayang-pandagat nga indi anay magpatunga sa kalalawran bangud sa posible pagtaas sang balud.
Wala pa sang pag-kansela sang byahe sang mga barko bangud wala pa sang storm signal ang probinsya apang kun may yara na, gilayon man sila nga magapaguwa sang advisory.
Dugang pa sang natungdan,padayon ang ila pagmonitor sa kalalawran sang syudad samtang ginabantayan man ang hulag sang Bagyo Tino.
Interviewed by: Bombo Sunnie Mae Batencila and Bombo Francis Biñas Good Morning Philippines
