ROXAS CITY, CAPIZ- Kadungan sang pagsug-alaw sang 127th Philippine Independence Day sa pungsod, Hunyo 12, 2025, nagpatigayon sang komemorasyon ang probinsya sang Capiz nga nagapakita sang pagpasidungog sa mga baganaihan sa pungsod sa pag-angkon sang kahilwayan gikan sa mga espanyol.
Sa nangin mensahe ni Dr. Eric Viculado sang Makawiwili Masonic Lodge No. 55 Free and Accepted masons of the Philippines, iya ginsiling nga hayahay sang pungsod may dako nga simbolo para sa tagsa-tagsa.
Ginsiling sini nga ang hayahay ang simbolo sang paghiliusa sang mga Pilipino sa ano man nga patag nga nagresulta sang kalinong kag kahilwayan.
Nahibaluan nga ang adlaw nagasimbolo sang wala katapusan nga kabuhi sang pungsod kag nagaserbe nga suga sang tagsa-tagsa, ang tatlo naman ka mga bitoon ang nagasimbolo sang tatlo ka mga rehiyon sang pungsod – Luzon, Visayas, kag Mindanao; nagasimbolo naman sang kalinong kag manaya-naya nga mga handom sang tagsa-tagsa ang puti nga trianggulo, ang bughaw ukon blue naman nga kolor ang nagasimbolo sang pagpalangga sa pungsod ukon ang nasyonalismo kag patriotism, kag ang pula nga kolor nga makit-an sa flag ang nagasimbolo sang mga kinaagman sang tagsa ka mga Pilipino.
Sa kabilugan, ang hayahay sang Pilipinas suno kay Dr. Viculado, nagasimbolo sang kapatiran sang mga Pilipino sa idalom sang pag-gabay sang Ginoo.
Samtang, mensahe ni Dr. Vinculado, nga kinahanglan hatagan sang dako nga pagrespeto kag importansya ang hayahay sang pungsod bangud indi lang ini sang basta nga hayahay kundi isa ini ka pahanumdom sa tagsa-tagsa may kaangtanan sa pag-angkon sang kahilwayan sang Pilipinas kag mga Pilipino.
