Wala pa sang ano man nga impormasyon ang Philippine National Police (PNP) natuhoy sa lugar nga nahamtangan ni Senator Ronald “Bato” Dela Rosa.
Suno kay kay Philippine National Police Acting Chief Police Lieutenant General Jose Melencio Nartatez Jr., indi pa nila bal-an kun sa diin ang senador kag wala man ini sang warrant of arrest.
Ini ang kasunod sang pahayag ni anay Presidential Spokesperson Atty. Harry Roque nga ginaalegar nakagwa na ang warrant of arrest ni Dela Rosa halin sa International Criminal Court (ICC). Apang hugot nga ginpanginwala sang Department of Justice (DOJ) kag Department of Interior and Local Government (DILG) nga hawid nila ang nasambit nga warrant.
Madumduman nga kalakip si Senador Dela Rosa sa mga ginreklamo sa International Criminal Court bangud sa iya nga nangin katungdanan bilang PNP chief sang panahon ni anay President Rodrigo Duterte, partikular sa ginpatuman nga war against drugs.
