CAPIZ – Gin-anunsyo sang Philippine Red Cross Capiz Chapter ang pagpabaskog pa sang mga preparasyon sa pagpasiguro sang safety kag well-being sang mga Capizeño subong nga holiday season.
Sa interview sang Bombo Radyo kay Mr. Raymundo Martinez, Administrator sang Philippine Red Cross Capiz Chapter, iya ginpahayag nga lakip sa mga readiness measures amo ang deployment sang first aid teams, mga abulansya kag disaster response volunteers sa nagkalain-lain nga area sa probinsya.
Suno kay Martinez, mas maayo gid kuntani nga sa isa ka balay may yara sang trained nga indibidwal nga nakahibalo mag-practice sang first aid sa tion nga may yara sang malukpan sang palupok.
Nagapakig-angot man ang organisasyon sa local government units kag law enforcement agencies agud mapabaskog pa ang disaster and emergency response ilabi na sa mga events nga nagadugok ang tawo kag may public gatherings.
Nagapanwagan ang Capiz chapter sa publiko nga i-practice ang safety precautions, magpabilin nga alerto kun mag-travel kag i-report gilayon ang ano man nga insidente agud masiguro nga mahatagan sang bulig.
Pinaagi sa sini nga proactive measures, nagalaum ang Philippine Red Cross nga mangin malipayon kag hilway ang holiday season.
