ROXAS CITY, CAPIZ- Naglunsyar sang mga programa ang Philippine Red Cross Capiz Chapter nga nagasentro sa pagpalapad sang ihibalo kag kahandaan sang mga pumuluyo sa tion sang kalamidad kadungan sang 2025 National Disaster Resilience Month sa pungsod.
Sa interview sang Bombo Radyo kay Mr. Raymundo Martinez, Administrator sang Philippine Red Cross Chapter iya ginpahayag nga ang ila talatapan ang nagpatigayon sang mga seminar, disaster drills, kag trainings sa mga komunidad agud mapakigbahin ang kinahanglanon nga ihibalo para sa mga posible nga kalamidad.
Dugang pa sini nga ang katuyo-an sang programa amo ang paghatag sang mga tools kag resources para mas mapabakod ang kapasidad sang mga tawo nga magbangon sa tunga sang kalamidad.
Nahibaluan nga nag-organisar man ini sang mga blood donation drives kag health check-up sa mga komunidad nga nagatuyo nga masiguro nga may bastante nga suplay sang dugo kag medical nga kagamitan, labi na sa mga biktima sang kalamidad.
Ang Philippine Red Cross naghatag man sang mga modernong kagamitan sa mga lokal nga gobyerno (LGUs) nga magagamit sa mga emergency response operations.
Ginpasalamatan man sang Philippine Red Cross ang kontribusyon sang mga volunteer nga nagabulig sa pagpatigayon sang mga aktibidad. Ginapangabay man nila ang tanan nga magkooperar sa mga kalihukan, agud magbinuligay sa pagpalig-on sang kahandaan sang pungsod sa tunga sang mga kalamidad.
Interviewed by Bombo Francis Biñas and Bombo Sunnie Mae Batencila
