Nagpahanumdom ang Philippine Institute of Volcanology and Seismology (PHIVOLCS) Capiz sa publiko kaangut sa “Tsunami Trio,” nga amo ang tatlo ka natural nga palatandaan sang posible nga pag-abot sang tsunami.
Ang “Tsunami Trio” nagalakip sang Shake, Drop (ukon Rise), kag Roar, ang Shake amo ang mabaskog kag malawig nga linog, ang Drop ukon Rise amo an pagnubo ukon pagsaka sang tubig sa baybayon, samtang ang Roar amo ang mabaskog nga tingog halin sa dagat.
Ini kasunod man sang nagtuhaw nga coastal uplift ukon pagsaka sang duta sa higad sang baybayon sa Barangay Pangyan, Sarangani matapos ang magnitude 7.8 nga linog sang Hunyo 8.
Sa interview sang Bombo Radyo kay Engr. Reynaldo Antioquia, Science Research Analyst sang PHIVOLCS Capiz, iya ginpahayag nga wala pa sang na-record nga kaso sang coastal uplift sa probinsya sang Capiz.
Suno kay Antioquia, sa tion nga magtuhaw ang coastal uplift nagakahulugan nga indi na ini magapanumbalik sa una sini nga kahimtangan.
Gani, ginaabisuhan ang publiko nga mangin alerto sa mga palatandaan sang tsunami kag magsunod gilayon sa mga abiso kag evacuation orders sang mga otoridad sa tion sang linog ukon iban pa nga kalamidad.
