Napaslawan nga makakuha sang suporta ang pila ka mga lider sang Quad Committee sang Kamara de Representantes sa bag-o lang nagtakop nga May 12 elections.
Nahibaluan nga wala ginsuwerte si Congressman Benny Abante nga makuha ang 6th District sang Manila matapos nga ginlutos siya sang kasumpong nga si Joey Uy. Naabantehan ni Uy si Cong. Abante sang masobra 1,500 votes.
Samtang nagkandidato naman si Sta. Rosa Rep. Dan Fernandez bilang gobernador sang Laguna apang ginlutos siya ni Sol. Aragones. Nagpangatlo lamang si Fernandez sa gubernatorial race sa nasambit nga probinsya matapos makakuha sang masobra 280,000 votes samtang si Aragones ang nagkamada sang masobra 627,000 votes kag pangaduha si Ruth Hernandez nga nakakuha sang masobra 538,000 votes.
Nalab-ot naman ni Abang Lingkod Rep. Stephen “Caraps” Paduano ang term limit gani indi na ini magbalik sa 20th Congress.
Ang lead chair sang Quad-Comm nga si Surigao del Norte Representative Robert ‘Ace’ Barbers ang nakalab-ot man sa term limit gani indi naman ini makabalik sa masunod nga kongreso.
Sa apat nga kongresista nga nagserbe bilang orihinal nga co-chair sang nasambit nga komite, si Antipolo Representative Romeo Acop lamang ang magaserbe sa 20th Congress.
Nagpadalagan nga unopposed si Acop sa Antipolo kag nakakuha sang 131,925 votes.
Una nga natukod ang Quad Committee sadtong August 2024 agud imbestigaran ang ginaalegar koneksyon sang illegal drugs trade kag Chinese drug smuggling sa Pilipinas, Philippine Offshore Gaming Operators, systematic police abuse, kag iban pa nga anumalya nga ginapahayag natabo sa idalom sang nakaligad nga administrasyon.
Ini ang ginakabug-usan sang apat ka nagapanguna nga komite sang Kamara kasubong sang Dangerous Drugs, Human Rights, Public Order and Safety, kag Public Accounts.
Apisar nakapaguwa na ang Quad sang rekomendasyon kasubong sang pag-file sang criminal cases batuk kay former Pres. Rodrigo Duterte kag iban pa nga kaalyado, apang sa karon indi pa maathag kun magapadayon ang high-profile investigation sang gamhanan nga komite sa masunod nga Kongreso.
