ROXAS CITY – Nakabaton sang extortion letters gikan sa rebelde nga New People’s Army ang pila ka mga kandidato sa Rehiyon 6 nga nagapapili para sa nagahilapit nga May 2019 midterm elections.
Ini ang ginkompirmar mismo ni Police Regional Office (PRO-6) Spokesperson Police Superintendent Joem Malong sang mainterview sang Bombo Radyo Roxas.
Suno kay Malong, nakalab-ot na sa ila ang kopya sang sulat nga ginapadala sang rebelde nga grupo sa mga nagapapili sa nagahilapit nga eleksiyon.
Nasaad sa sulat nga pagapahanugutan lamang sang rebelde nga grupo ang mga kandidato nga magpangampanya sa mga lugar nga ginakabig ‘red areas’ kabaylo sang kwarta.
Wala naman gintumod ni Col. Malong ang kantidad nga ginapangayo sang mga rebelde apang ginpanugyanan sini ang mga kandidato nga indi magpadala sa mga pamahog sang rebelde nga grupo.
Ginpasiguro man sang opisyal nga magapanabat ang sinuman nga kandidato nga mapamatud-an nga nagasuporta sa rebelde nga NPA.
