ROXAS CITY – Nagapreparar na ang kadam-an sang mga buluthoan para sa pagpatigayon sang implementasyon sang face-to-face graduation sa syudad.
Ini ang ginpahayag ni Dr. Roel Bermejo, Schools Division Superintendent of Roxas City sang mainterview sang Bombo Radyo.
Ginsiling sini, padayon sa gihapon ang validation process sang mga naga-apply sa implementasyon sang face to face graduation kag classes.
Suno kay Dr. Bermejo, ang pag-endorso sang face-to-face graduation kag classes ang nagaba-se sa mga buluthoan kun sila luyag magpakonsulta sa Local Inter-Agency Task Force (IATF) nga amu ang naga-assess kun ang ila buluthoan ang kwalipikado, kag paga-aprobahan naman ang nasambit nga assessment sang alkalde.
Ginpahayag sang opisyal, importante ang parents consent sa pagpatigayon sang face-to-face graduation kun sa diin may yara sang ginatawag nga simplified event management plan ang mga buluthoan agud mapabilin ang seguridad sang magapartisipar sa face-to-face graduation rites.
Ginahatagan sang opsyon ang mga ginikanan kun luyag nila ang face-to-face graduation, virtual graduation, ukon wala na lamang kun sa diin ila ini iga-implementar sa tagsa ka buluthoan.
Nakonsiderar man suno diri ang venue capacity kun nagasanto sa kadamuon sang magapasakup nga mga graduating students kalakip na ang mga ginikanan.
Samtang, nagalaum si Bermejo nga 100% sang buluthoan ang handa na para sa face-to-face classes sa palaabuton nga new school year kun sa diin ba-se sa initial pronouncement, magasugod na sa Agosto 22, 2022.
Suno diri, 24 na ka mga buluthuan ang nag-implementar sang limited face-face class kag madamo pa sa karon ang naga-apply.
Panugyan man sini sa mga kabataan nga magpabakuna para sa nagakaigo nga proteksyon.
