ROXAS CITY, CAPIZ- Nag-angkon sang minor damages kag litik ang pila ka mga hulot-klasehan sang Capiz State University matapos nga naka-eksperyensya sang Intensity IV nga linog ang probinsya sang Capiz.
Sa interview sang Bombo Radyo kay Dr. Efren Linan, Capiz State University President, iya ginpahayag nga sa pulo ka mga campuses, may yara sang tatlo ang narekord nga may damages.
Ginkalakipan ini sang Capiz State University Dumarao Campus, Capiz State University Tapaz Campus, kag Capiz State University Pontevedra Campus.
Suno kay Linan, nagtukod na sila sang composite team agud nga mag-usisa sa estruktura sang tagsa ka mga hulot-klasehan kag building nga nag-angkon sang litik agud nga masiguro ang safety sang lunsay mga estudyante kag mga manunudlo.
Pahayag pa nya, ang amo nga mga classrooms ang indi pa mahimo nga magamit bangud kaangay nga peligroso pa sa subong.
Nahibaluan nga balik sa face-to face class na subong nga adlaw ang klase matapos nga gindeklara nga asynchronous class anay kahapon.
Nagapasalig ang pamunuan sang unibersidad nga unahon gid ang seguridad sang tagsa-tagsa agud nga makalikaw sa kun ano man nga sahi sang insidente ang posible nga magluntad.
Interviewed by Bombo Francis Biñas
