Nagahingagaw pa ang pila ka mga eskwelahan sa Roxas City sa pagpanglimpyo kag pagka-ayo sang ila mga pasilidad bilang kabahin sang Brigada Eskwela antes ang pagbukas sang klase.
Sa interview sang Bombo Radyo kay Jose Richard Lachica, principal sang President Manuel Roxas Memorial Integrated School (South), iya ginpahayag ang pagpatigayon sang Brigada Eskwela agud man masiguro nga handa kag limpyo ang eskwelahan sa pag-abot sang mga estudyante kag mangin mas komportable sa ila pagtuon.
Suno kay Lachica, nagadamo ang numero sang mga nagapa-enroll sa ila eskwelahan gani kinahanglan nga preparado ang mga pasilidad para sa mas madamo nga mga estudyante.
Dugang pa sini nga may bag-o na nga pasilidad kag natapos naman ang mga minor repair sa mga hulot-klasehan nga makabulig a pag-akomodar sang nagadugang nga populasyon sang mga estudyante.
