ROXAS CITY, CAPIZ- Pagasiraduhan ang pila ka mga karsada sa syudad sang Roxas bwas nga adlaw, Nobyembre 23, 2025 kadungan sang Christ the King Vicarial Celebration 2025.
Sa interview sang Bombo Radyo Roxas kay Mr. Gonzalo Andrada, Head sang Traffic Management Unit-Roxas City, iya ginpahayag nga ini bangud sa magapatigayon sang Eucharistic Procession ang Simbahang Katolika sa syudad.
Suno kay Andrada, maga-umpisa ang procession takna las 4:00 sang hapon halin sa Villareal Stadium padulong sa Immaculate Conception Metropolitan Cathedral.
Pahayag niya, pagasiraduhan ang Macopa Street, Barangay Tiza, Fuentes Drive, Roxas Avenue kag ang Roxas City Plaza.
Magapahamtang naman sang mga road signage kag traffic auxiliaries sa tagsa ka mga ruta sang dalan nga siraduhan.
Amat-amaton ini nga buksan pag-matapos na ang nasambit nga prosisyon.
Nagapanawagan ang sa tagsa ka mga motorista sang kooperasyon, agud nga malikawan ang kun ano man nga insidente ang posible nga magluntad kadungan sang amo nga selebrasyon.
Interviewed by Bombo Sunnie Mae Constantino Batencila
