ROXAS CITY – Nagpaguha sang hibubun-ot ang isa ka PUJ driver, matapos matukiban nga may yara sa gihapon sang pila ka mga pampasahero nga salakyan nga padayon nga naga-biyahe apisar nga wala ini naka-consolidate kadungan sang pagsugod sang gina-implementar sang LTFRB.
Mahibaluan subong nga adlaw Mayo 16, ginadumilian na nga magbyahe ang mga operators kag drivers nga wala naka-consolidate.
Pananglitan nga madakpan ang mga ini nga ginalapas ang amu nga pagsulundan, mahimo nga magbayad sang penalidad nga P50,000.00, 1 ka tuig nga suspension kag pagka-impound sang salakyan sa sulod sang 30 diyas.
Sa interview sang Bombo Radyo kay Jesus Dumot PUJ driver may rota nga Maayon-Roxas City vice versa, ginpahayag sini nga sa 16 sila nga mga operators kag drivers sa ila banwa 1 lamang ang wala nagpaconsolidate rason nga wala na ini gintugutan nga makabyahe pa.
Suno kay Dumot nga kun tani hugot nga pasangkaron sang tagdumalahan ang pagpangdakop sa mga salakyan nga wala naka-consolidate ukon matawag nga ‘kolurom’ bangud may yara sa gihapon sang padayon nga nagabyahe kag nakalusot.
Dako ini suno diri nga kabuhinan sa ila nga kita bilang legal nga nagabiyahe kag nagapangabuhi.
Ginpahayag man sini nga madamo nga mga drivers kag operators ang nag-untat na sa pagbiyahe kag ginbaligya na lamang ang ila nga mga unit bangud sa ginaduso nga PUV modernization sang Land Transportation Franchising and Regulatory Board (LTFRB).
Nagalaum man ini nga kun tani mahatagan ini sang pagdangup bangud daw kaangay nga wala ginasunod ang ginpahamtang nga signage nga bawal magsulod sa terminal ang mga kolurom.
