Ginbuyagyag sang pila ka mga executive sang Philippine Offshore Gaming Operators (POGO) ang pagsuhol sa ila ni Alice Guo para lamang indi magkanta.
Suno sa testimonya sang isa ka alyas Alex nga nagaserbe treasurer sang Zun Yuan Technology, una sila nga ginpalapitan sang kampo ni Guo sadtong 2023 kag gina-offeran sang P20,000 kada bulan.
Kabaylo sini ang paggamit sa ila pangalan bilang mga incorporator sang isa ka POGO Company.
Kaupod ni Alyas Alex nga gin-offeran ang corporate secretary sang Zun Yuan.
Nagpasugot naman ang mga ini tubtob sa ginsalakay na ang POGO kun sa diin gingamit ang ila nga pangalan kag dalayon nga ginpatawag sang National Bureau of Investigation, Kamara de Representantes, kag Senado.
Kasubong man, ginlapitan suno sila sang isa ka staff ni Guo nga ginkilala bilang si Jeremy Santos, kag ginhatagan sang tig – P500,000.
Ginganyat suno sila sang kampo ni Guo nga magbaylo sang address, indi nga magkanta ukon magsugid sang anuman kag atubangon nila ang kaso.
Ang duha ka POGO executive ang una nga nagsurender subong nga semana sa National Bureau of Investigation.
