Mapatuman sang pila ka mga road closure sa syudad sang Roxas para sa prusisyon sang mga paso subong nga Biyernes Santo.
Ini nga prusisyon ang para sa mga paso sang Immaculate Conception Metropolitan Cathedral kag Mt. Carmel Parish Church.
Sa interview sang Bombo Radyo kay Mr. Gonzalo Andrada, Head sang Traffic Management Unit, Roxas City, iya ginpahayag nga ang prusisyon sa bahin sang Immaculate Conception Metropolitan Cathedral ang magaagi humalin Rizal Street pakadto sa Legaspi Street, sa J.M. Basa Street tubtob Magallanes antes magbalik sa simbahan.
Sa pihak nga bahin, ang prusisyon naman sang Mt. Carmel ang magaumpisa sa Mansion Road, padulong Roxas Avenue, magaliko sa Fuentes Drive kag San Roque Extension, pakadto TATC North Road, Altavas Street, Premiere de Mayo, kag Bayot Drive antes magbalik sa simbahan.
Pahayag niya antes ipatuman ang road closure sugod alas-12 sang udto subong nga adlaw, posible man nga amat-amat nga isira ang iban nga dalan sang mas temprano agud makapwesto ang mga paso kag pagabuksan sa tion nga matapos na ang prusisyon.
Dugang pa niya, may signages kag Traffic Management Unit (TMU) personnel nga naka-standby agud magbulig kag maghatag direksyon sa mga naga-biyahe.
Sa kabug-usan, kapin 72 ka mga personnel ang iga-deploy para masiguro ang katawhay sang duha ka aktibidad.
Nagahingyo man ang natungdan sang kooperasyon sa mga motorista kag magatambong sa prusisyon kag magsunod sa pagsulondan agud mapabilin nga matawhay kag malinong ang prusisyon sang mga paso.
