Liwat nga nalakip ang Pilipinas sa listahan sang 10 ”worst countries” para sa mga trabahador, sandig sa 2024 Global Rights Index sang International Trade Union Confederation (ITUC) nga ginpaguha sang Biyernes, Hunyo 6, 2025.
Ika-siyam nga nga sunod nga tuig nga kalakip ang Pilipinas sa listahan nga ini, suno sa Workers Rights Watch kasubong sang Kilusang Mayo Uno, Unyon ng mga Manggagawa sa Agrikultura, National Federation of Sugar Workers, Alliance of Concerned Teachers, Kilusan ng Manggagawang Kababaihan, Confederation for Unity, Recognition and Advancement of Government Employees, Public Services Labor Independent Confederation, Bukluran ng Manggagawang Pilipino (BMP), Migrante Philippines, kag Center for Trade Union and Human Rights. Magluwas sa Pilipinas, kalakip man sa 10 ”worst countries” para sa mga trabahador ang Bangladesh, Belarus, Ecuador, Egypt, Eswatini, Myanmar, Nigeria, Tunisia, kag Turkey.
Base sa report, masami nga ginalapas sa Pilipinas amo ang kinamatarong sa pagwelga nga may 87% nga ratings, ginsundan sang kinamatarong sa collective bargaining nga may 80%, kinamataron sa pagtukod ukon pag-intra sa union nga may 75%, kag kinamatarong sa hustisya nga may 72%.
Samtang, suno kay Labor Secretary Bienvenido Laguesma nga wala ginkonsiderar sang report ang mga tikang sang sa karon nga administrasyon agud masolusyunan ang madugay na nga isyu. Ginsiling sini nga kun tuod nga isa ang Pilipinas sa pinakamalain nga pungsod para sa mga trabahador, indi kuntani ini napilian nga mangin myembro sang ILO Committee on Freedom of Association sang nakaligad nga tuig.
