ROXAS CITY – Generally peaceful ang paghiwat sang 2025 midterm elections sa probinsiya sang Capiz suno sa Capiz Police Provincial Office.
Sa interview sang Bombo Radyo kay CPPO Information Officer PCAPT Merry Chris Dela Cruz, iya ginpahayag nga sa kabug-usan malinong ang piniliay sa probinsya kag wala sang nabalhag nga mga untowards incident.
Suno kay Dela Cruz may pila lamang ka insidente ang natabo may kaangtanan sa eleksyon kasubong sa banwa sang Mambusao sa diin nadakpan ang duha ka lalaki nga nag-picture sang ila balota, pagpangtiklod sang isa ka kandidato sa syudad sang Roxas kag isa ka senior citizen ang gindulaan sang kabuhi bangud naglain ang pamatyag samtang nagaboto tungod sa init sang tyempo.
Apang magluwas diri, matawhay ang mga kabanwahanan kag syudad sang Roxas sa tion sang pinilay.
Pahayag pa ni Dela Cruz nga dako ang ila pagpasalamat sa mga partner agencies kasubong sang Philippine Coast Guard kag iban pa nga nagbulig sa pagbantay sang seguridad sa election.
Nahibaluan nga naglab-ot sa 1,327 ang gin-deploy nga kapulisan sa Capiz para mapasiguro ang malinong nga eleksyon.
