Nakarekord ang piso sang P60 kada US Dollar subong nga adlaw, ang pinakamahuyang nga lebel sa kasaysayan.
Narehistro ang intraday low sa P60.4 kag ang average ang P60.161 matapos nga nagsugod sa P59.9 ang opening rate.
Apang, indi pa ini ang katapusan nga rekord para sa Huwebes.
Suno sa mga analista, ini ang tuga sang padayon nga pagsaka sang presyo sang langis sa pangkalibutanon nga merkado kag tensyon sa Middle East.
Ang dolyar nagbaskog man samtang ang mga manugpuhunan nagsaylo sa mga safe-haven assets.
Ginpahayag sang Bangko Sentral ng Pilipinas (BSP) nga padayon ang ila monitoring sa sitwasyon kag handa nga magpatunga kun kinahanglanon.
Nagpaandam ang ekonomista nga si Prof Emmanuel Leyco sa interview sang Bombo Radyo nga ang mahuyang nga peso ang magatulod sa pagpataas sang presyo sang mga imported goods, ilabi na ang petrolyo.
Bangud sini, ginalauman nga magataas pa gid ang inflation kon padayon nga magnubo ang piso batuk sa dolyar.
