ROXAS CITY – Hugot nga ginsiling sang pamunuan sang Pinagkaisang Tsuper at Opereytor Nationwide (PISTON) Capiz nga indi sila mag-upod sa patigayunon nga transport strike sa pungsod subong Hunyo 5, 2025 nga hagna sa Land Transportation Franchising and Regulatory Board.
Sa interview sang Bombo Radyo kay Mr. Joebert Carandang, Chairman sang PISTON Capiz, ginpahayag nga bangud sa matumal nga income sa pasada, nagdesisyon ang ila nga grupo nga indi magpatigayon sang untat byahe sa probinsya sang Capiz subong nga adlaw.
Apang, suno sa iya, 100 porsyento naman sila nga naga-ugyon kag nagasuporta sa mandu sang Land Transportation Franchising and Regulatory Board.
Dugang pan sini, magapatigayon lamang sila sang transport strike kun mabutang sila sa sitwasyon nga kaangay gina-ipit na sila may kaangtanan sa Public Transport Modernization Program.
Nahibaluan nga ang mga moderno nga jeepney ang nagabalor sang P2.5 milyon tubtob P2.8 milyon kun sa diin suno sa iya mahal kag indi kaya nga baklon sang mga ordinaryo nga jeepney operators.
Panawagan sini sa nagkalatungdan, nga kuntani ibasura ang amo nga palpak nga programa nga modernisasyon kag ibalik ang mga nag-uluntat na sa operation nga mga operators kag ibalik man ang 5 years franschise ssang amo nga mga Public Utility Vehicles (PUV).
Samtang, sa probinsya sang Capiz, yara na sa kapin 100% ang naka consolidate nga unit sang jeepney bangud nga kun indi ini maka consolidate, mahimo nga mapauntat ang operasyon sang mga operators kag drivers nga magresulta sang pagkadula sang pangabuy-anan.
