Pabor ang lider sang Pinagkaisang Tsuper kag Operator Nationwide (PISTON) Capiz sa pagpatigayun sang pagsulondan sang Department of Transportation (DOTr) nga ipaidalum sa mandatory drug kag alcohol testing ang tanan nga mga public vehicle drivers.
Sa interview sang Bombo Radyo kay Mr. Joebert Carandang, Presidente sang PISTON-Capiz, ginapahayag nga tanan sila sa grupo ang maluyagon nga magasunod sa mandu sang Department of Transportation (DOTr) nga ipaidalum ang tagsa ka mga public vehicle drivers sa mandatory drug kag alcohol testing apang ginakabalak-an sang mga driver kag operator ang ila sini paga-gastuson sa amu nga testings.
Dugang pa sini, ang tagsa ka miyembro sang grupo ang nag-ugyon sa sini man nga mandu bangud nahibaluan sini nga para man ini sa kaayuhan sang tagsa-tagsa, kag luyag pa sang iban nga mga operators kag drivers nga mapaidalom man sila sa pila ka mga trainings kag examinations.
Nahibaluan nga ang ini nga pagsulundan ang kasunod sang masami na nagakahinabo nga aksidente sa dalanon kun sa diin masami nagaguha sa tagsa ka imbestigasyon nga ang rason amu ang yara sa impluwensya sang makahulubog nga ilimnon ang tagdumala sang pampubliko nga mga behikulo.
Matandaan nga ginpirmahan ni Department of Transportation Secretary Vince Dizon ang mando nga ipaidalum sa mandatory drug testing ang tanan nga public vehicle drivers, kag dapat nga yara lang sa anum tubtob apat ka oras ang driving hours sang tagsa ka mga drivers kag operators.
Samtang, nagapanawagan naman si Mr. Carandang sa mga nagkalatungdan nga mga ahensya sang bulig para sa mga operators kag drivers agud nga mangin epektibo ang ini nga direkteba.
