Ginkumpirma sang New NAIA Infra Corp. (NNIC) nga nagadumala sang airport, nga yara sa “stable condition” ang pito ka mga indibidwal nga napilasan sa pagkarumpag sang kisame sa Ninoy Aquino International Airport (NAIA) Terminal 1 subong nga Biyernes Santo.
Suno sa pamunuan, gilayon nga nagresponde ang medical team sang NNIC, airport security personnel kag ang Philippine National Police (PNP) Aviation Security Group sa mga apektado nga indibidwal.
Gilayon man nga ginkordon ang West Arrival Curb C area sa gwa sang passenger terminal building sang NAIA Terminal 1 malapit sa food concession outlet.
Gin-usisa naman sang NNIC engineering team ang palibot nga lugar kag ginkumpirma nga safe na ini para sa normal nga operasyon.
Sa subong, nagapadayon ang imbestigasyon agud mahibaluan ang gintunaan sang insidente kag hugot nga nagapakig-angot ang tagdumalahan sa mga otoridad kag ginpasalig nga pagahimuon ang nagakaigo nga tikang base sa mga findings.
