Ginatun-an sang Metro Roxas Water District (MRWD) ang plano nga nga water rate adjustmentagud mapasangkad serbisyo sang talatapan.
Sa interview sang Bombo Radyo kay Atty. Dante Arcangeles, General Manager sang Metro Roxas Water District, iya ginpahayag nga ang proposal sang pagtaas sa water rate ang pagagamiton para sa mga infrastructure projects kaangay sang pagkaayo kag pagdugang sang pipelines, transmission lines, reservoirs kag iban pa nga pasilidad agud mapabaskog ang serbisyo sang patubig.
Suno kay Arcangeles, ang ini nga tikang ang para man sa pagpalig-on sang serbisyo kag pagpreparar sa masunod nga pagtaas sang water demand sa mga banwa sang Panay, Ivisan, Panitan kag syudad sang Roxas.
Sa nasambit nga proposal, may yara sang duha ka tranche sa pagtaas sa bill nga ipatuman sa mga konsumidor.
Pahayag pa niya, kun maaprubahan sang Interim Office of the Water Administrator (IOWA) ang proposal, may patigayunon nga deliberation sa mga katapo sang talatapan para sa pagplastar sang pila ka proposed infrastructure projects nga pagapondohan gamit ang malikom sa nasambit nga water rate adjustment.
Nahibaluan nga tuig 2015 ang ulihi nga adjustment kag bangod sang pagsaka sang inflation kag presyo sang mga materyales sang mga pasilidad, kinahanglan na ang pag-review sang water rate.
Nagapanawagan man an natungdan sa mga konsumidor nga kun kun mahimo magtipid sang paggamit sang tubig agud malikawan ang pag-usik kag masiguro ang husto nga serbisyo para sa tanan.
