Ginpanginwala sang Department of the Interior and Local Government (DILG) nga ginpahalin sa pwesto si PNP chief Gen. Nicolas Torre III bangud wala sini gin-aprubahan ang pagbakal sang 80,000 ka armas luthang para sa pwersa sang kapulisan.
Ginpahayag sang DILG nga kabutigan kag indi matuod ang isyu nga wala niya gintuman ang mando ni Interior Secretary Jonvic Remulla.
Mismo ang Secretary ang nagsugo kay Torre nga tun-an sing maayo ang pagbakal sang dugang nga armas para sa pwersa sang kapulisan.
Ginpahanumdom man sang tiglikom kay Torre nga mahimo paagi sa congressional insertion ang nasambit nga pagbakal bangud wala ini nalakip sa National Expenditure Program.
Ginklaro man sang DILG nga wala gid naghimo sang endorsement si Remulla para sa anuman nga congressional budget insertion.
Nag-ugyon man ang Secretary kay Torre sang nagsiling ini nga indi na kinahanglan ang dugang nga mga armas.
Madumduman nga nagtuhaw ang report nga ginpahalin si Torre bilang hepe sang PNP bangud ginsikway sini ang proposal nga magbakal sang dugang nga armas para sa pwersa sang kapulisan sang pungsod.
