Nagpahayag sang kahandaan ang Philippine National Police (PNP) nga batunon sa ila kustodiya ang anay Ako Bicol Representative nga si Zaldy Co sa oras nga mag-abot ini sa Pilipinas.
Suno kay PNP Chief PGen. Jose Melencio Nartatez Jr., nagakoordinar na sila sa iban nga ahensya sang gobyerno, labi na sa Department of Foreign Affairs (DFA), para sa mga kinahanglanon nga legal kag diplomatic nga proseso may kaangtanan sa iya ginapaabot nga pagbalik sa pungsod.
Ginsiguro man sang PNP nga ang tanan nila nga himuon nga proseso magasunod sa mga nagapadayon nga tikang kag due process.
Matandaan nga ginpahayag man ni DILG Secretary Juanito Victor “Jonvic” Remulla nga pag-abot ni Co, deretso ini nga dal-on sang PNP para sa booking kag dokumentasyon kaangay sang physical examination kag pagkuha sang mugshot antes siya ipaatubang sa Sandiganbayan para sa return of warrant of arrest batuk sa iya.
