ROXAS CITY -Mas ginpasangkad pa sang kapulisan ang ila nga monitoring angut sa report nga pagduging sang illegal numbers game.
Ini kasunod sa ginbuy-an nga statement ni Police Col. Canilo Fuentes, provincial director sang Capiz Police Provincial Office (CPPO) nga may nagapatigayon sang illegal numbers game kasunod sa pagkadula sang Small Town Lottery (STL) sa probinsiya.
Ginpahayag ni Police Master Sergeant Ramil Arcangeles, tagpamaba sang Roxas City PNP nga nagapabilin sa Top Priority sang provincial director ang pagtapna sa iligal nga sugal sa probinsiya partikular na ang illegal numbers game.
Nahibaluan nga nagpaandam si Police Col. Fuentes sa mga yara sa likod sang iligal nga sugal nga mag-untat na, bangud nagahulag ang mga kapulisan agud sila ang madakpan.
Ginpasiguro pa ni Arcangeles ang pagtuman sang kapulisan sa mandu ni Fuentes sa diin may tracker sila nga nagaba-se sa ginahatag nga impormasyon sang intelligence section agud matumod ang ginapanaguan sang mga imbolbado sa iligal nga sugal.
Nahibaluan nga ginbag-o na sang mga iligalista sa illegal numbers game ang ila estilo, bangud wala na sila nagahatag sang koteho kag ginapaagi na lamang sa text.
Ginaalegar nga ginakuha sang mga tawo nga yara sa likod sang iligal nga sugal ang winning number sa resulta sang lotto.
Ginpasiguro pa ni Arcangeles nga pananglitan ila madakpan ang yara sa likod sini, mahimo sila nga mapasakaan sang panumbungon.
