ROXAS CITY -Liwat naghinyo sang kooperasyon sa publiko labi na sa mga may ihibalo sa mga suspek nga responsable sa pagluthang-patay sa anay broadcast journalist kag anay Pilar administrator John Heredia nga magkooperar sa kapulisan agud mahatagan sang kasanag ang imbestigasyon sa nagluntad nga krimen.
Ginpahayag ni Police Master Sergeant Ramil Arcangeles- Information officer sang Roxas City PNP mas ginapadalman sa karon sang kapulisan labi na sang Special Investigation Task Group ang imbestigasyon sa krimen kag ila ginatipon ang makuha nga mga ebedensiya.
Nakabulig man sa imbestigasyon ang nakuha nga CCTV footage sang Barangay Lawaan sa diin nakita ang presensiya sang gunman kag driver sang motorsiklo nga nagserbe getaway vehicle, apang indi maklaruhan ang ila nawong.
Sa pagreview man sa CCTV footage sang CITI Hardware posible nakaplastar na ang triggerman kag nalabayan pa ini sang biktima.
Nahibaluan nga magasulod na kuntani sa iya salakyan si Heredia sang gintiro ini.
Wala na makahalin pa ang biktima sa ginatindugan bangud nangin asud asod na ang pagluthang sa iya sang suspek nga nagpalapit pa sa iya.
Samtang may natalupangdan nga makaduluda nga indibidwal sa CCTV footage sang nasambit nga establisemento nga nagsulod pila ka minutos matapos nagsulod si Heredia.
Ginapatihan nga isa ini sa mga naga-monitor sa biktima kag naga-imporma sa mga suspek.
Samtang nagpatigayon sang sinapol si Mayor Arnold Perez sang Pilar kag tiayon sang biktima nga si Atty. Cris Heredia kalakip ang gintukod nga special investigation task group.
Ginpahayag nga antes ang krimen, nakabuhi na sang tinaga si Heredia sa mga kaupdanan nga dapat maghalong sila.
Nahibaluan may yara sa escort si Heredia sa tagsa ka magpauli sa Roxas City bangud sa pila ka mga pamahog sa iya kabuhi.
Apang bangud pila na ka bulan nga kasubong matawhay na nagkumpyansa ini kag diri posible nakakita sang tsansa ang mga suspek kag ginhimo ang malain nga plano kay Heredia.
Sa karon suno kay Arcangeles nga indi pa makahatag sang konklusyon kun may kaangtanan sa iya trabaho ukon ang pagsuporta sini sa gobyerno ang matood nga motibo sa pagpatay kay Heredia.
Samtang ginkumpirma ni Arcangeles nga pito tanan ka mga kapilasan ang naangkon ni Heredia, sandig sa autopsy resulta .
Indi pa matumod sa karon kun ano ang kalibre sang armas ang gingamit sa pagluthang-patay kay Heredia sang riding-in tandem sa isa ka hardware sa Barangay Lawaan, sining syudad.
