Nagpanindugan ang Philippine National Police nga wala sang ginahatag nga espesyal ukon VIP treatment kay Manuel Bonoan samtang nagapadayon ang iya pagpabulong sa PNP General Hospital sa Camp Crame.
Suno kay Melencio Nartatez Jr., hugot nga ginamonitor sang PNP ang kahimtangan sang ikaayong-lawas sang anay opisyal kag sa tion nga ideklarar siya nga medically cleared, gilayon siya nga itugyan sa nagakaigo nga judicial authorities.
Ginsugo man sang PNP chief ang PNP Health Service kag ang Criminal Investigation and Detection Group nga magpadayon sa bug-os nga transparency, magpatuman sang istrikto nga seguridad kag siguruhon nga wala gid sang espesyal ukon VIP nga pagtratar kay Bonoan.
Madumduman nga nagsungka si Bonoan sa CIDG sang Lunes, apang samtang ginapaidalom siya sa booking procedures, nagsaka ang iya blood pressure, gani gindala siya sa PNP General Hospital para sa medikal nga pag-atipan.
Samtang, nagpahayag man si Gen. Nartatez nga magahimo ang PNP Health Service sang independente nga medical assessment sa kondisyon ni Bonoan.
Ang CIDG naman ang mangin responsable sa pagtipig sang kumpleto nga rekord sang iya confinement sa ospital, pagbulong kag tanan nga iya aktibidad samtang yara sa kustodiya sang kapulisan.
