Nagpasalig ang Philippine National Police nga mas pasangkaron sini ang pagpatrolya sa gab-i bangud sang nagakatabo nga rotational brownout sa nagkalainlain nga bahin sang pungsod.
Suno kay Jose Melencio Nartatez, ginmandu-an na niya ang mga regional kag provincial directors nga padugangan ang foot kag mobile patrols labi na gid sa mga residential area samtang may naka-iskedyul ang pagkadula sang kuryente sa gab-i.
Pahayag sang PNP Chief, posible nga magsaka ang insidente sang kriminalidad kaangay sang “akyat-bahay” kag iban pa nga street crimes kun madulom ang palibot tungod sang brownout.
Ginpahayag man sang PNP nga magapadayon nga operational ang Unified 911 hotline bisan may power interruption paagi sa ila backup power systems agud masiguro nga may masabat gihapon sa tagsa ka emergency call.
Madumduman nga ginpaidalom sang National Grid Corporation of the Philippines sa red alert status ang bug-os nga Luzon.
Bangud sini, ginabanta nga sobra 320,000 ka mga konsumedor ang posible maapektuhan sang rotational brownouts sa mga probinsya sang Bulacan, Cavite, Laguna, Metro Manila, Pampanga, Quezon kag Rizal.
