ROXAS CITY — Ginaayam na sang Pontevedra PNP ang mga suspetsado nga nagluthang-patay sa isa ka fishpond operator sa Barangay Malag-it sa amo man nga banwa.
Suno kay Pontevedra PNP chief PINSP. Marvin Balmes, may mga ihibalo na sila may kaangtanan sa identity sang pila sa apat ka mga suspetsado nga nagpatay sa biktima nga si Bernardo Dindo Belmonte, 49-anyos sang amo man nga lugar.
Base sa ila imbestigasyon nga nagahikot na sang panyapon ang biktima kaupod kay Ariel Borines, 36-anyos sang amo man nga lugar sang Martes sang gab-i sang may nakita sila nga apat ka mga lalaki nga nagalakat sa pilapil sang fishpond.
Ginguha nila ini kag ginpasikto apang hinali na lamang nga nagpalupok ang isa sa mga suspetsado kag naigo si Belmonte.
Gilayon nga gindala sa ospital ang biktima apang ini ang ginbawian man sang kabuhi samtang nakapalagyo naman ang mga suspetsado.
Ginapatihan nga isa ka revolver nga armas ang gingamit sa pagluthang sa biktima bangud wala sang narekober nga basiyo sang bala sa ginluntaran sang insidente.
Suno kay Balmes, may mga ginparekord na sadto ang biktima sa istasyon sang pulisya may kaangtanan sa mga nagapanggamo sa iya punong kag ini man ang ila nga ginatutokan nga motibo sang krimen.
Ginpasalig man sang hepe ang pamilya sang biktima nga mahatagan sang nagakaigo nga hustisya ang kamatayon sini.
