PONTEVEDRA, CAPIZ – Wala ginpabay-an kag madamo sa Sanggunian Bayan ang nagbulig nga nagpatunga kag nagtambag agud indi na magdugay pa ang kumusyon nga nagluntad sa tunga nila Mayor Henry Tumlos kag Liga President Delly Hansen sa ginpatigayon nga Christmas Party sang Office of the Vice Mayor kag Sangguniang Bayan sa banwa sang Pontevedra.
Sa interview sang Bombo Radyo kay Pontevedra Vice Mayor Fermin Nemesio Oquendo, ginpahayag sini nga nagsugod sa gamay nga diskusyon tubtob sa may nagluntad na nga pagbinaisay kag indi pag-intindihanay nga ginabanta nagdugay sa 15 minutos sa tunga nila Mayor Henry Tumlos kag Liga President Delly Hansen.
Dugang pa sini, agud mag-untat na ang mainit nga diskusyon, gin-updan sang isa ka SB member sang banwa si Hansen agud magguwa nalang sa lugar.
Suno pa kay Oquendo, wala sang kamatuoran ang nagalapta nga mga huring-huring angut sa nagluntad nga kumusyon.
Matandaan nga nag-viral sa social media ang post sang nasambit nga Liga President kun sa diin gina-punterya kag ginamulay sini ang amay sang nasambit nga banwa.
