Ginlubong na sa iya katapusan nga palahuwayan ang lider sang Simbahan Katoliko nga si Pope Francis kahapon nga adlaw, Sabado, Abril 26.
Ang seremonya sa lubong sang Santo Papa ginhiwat sang pribado kag simple sa Saint Mary Major Basilica, suno sa iya ginhingyo.
Ang isa ka grupo sang mga marginalized people gin-agda man sa paglinya sa mga halintang sang iya katapusan nga palahuwayan sa Basilica di Santa Maria Maggiore, sa katapusan sang funeral procession.
Si Pope Francis ang pinakauna nga Santo Papa nga ginlubong sa guwa sang Vatican sa sulod sang halos isa ka siglo.
Ang Santo Papa nagpangabay man nga ang iya lulubngan mangin simple, nga wala sing partikular nga dekorasyon kag ang inskripsyon lamang nga “Franciscus”.
Ang Santa Maria Mayor isa ka espesyal sa nagtaliwan nga Santo Papa tungod sang iya debosyon kay Maria, iloy sang Dios. Si Pope Francis masami nagapangamuyo diri antes kag pagkatapos sang iya mga pagbiyahe sa luwas sang pungsod.
Samtang, una na nga gin-anunsyo sang Vatican nga mahimo na nga makabisita ang publiko sa pantyon ni Pope Francis umpisa subong nga Dominggo sang aga, Abril 27.
