Ginpatpat ni Pope Leo XIV nga wala ginapamatian sang Diyos ang pangamuyo sang mga lider nga nagapasimuno sang giyera kag mga kamot nga puno sang dugo, samtang magapadulong na sa duha ka bulan ang tension sa Middle East.
Ini ang ginpahayag sang Santo Papa sa nilibo ka mga tawo nga nagtambong sa Palm Sunday Mass sa St. Peter’s Square sa Vatican City.
Suno sa iya, indi nagakadapat nga gamiton si Hesus agud mangin rason sang ano man nga sahi sang kinagamo.
Apisar wala ginsambit ni Pope Leo ang partikular nga mga lider, ang iya kritisismo sa inaway sa Iran ang mas nagbaskog sang nagligad nga mga semana.
Ang Santo Papa, nga kilala nga mahalong sa pagpili sang iya mga tinaga ang makapila ka beses nga nagpanawagan para sa gilayon nga pag-untat sang inaway kag nagdeklara sang Lunes nga ang mga airstrike sang militar wala sang ginapili kag dapat nga dumilian.
Nahibaluan nga ang pila ka mga opisyal sa Estados Unidos sang Amerika ang naggamit sang lenggwahe sang Kristiyanismo sa pagdepensa sang mga pag-atake sang US kag Israel sa Iran sang Pebrero 28 nga nagsugod sang nagalala nga inaway.
Samtang, ginpangunahan naman ni US Defense Secretary Pete Hegseth, ang pagpangamuyo sa Pentagon para sa ginakabig ” overwhelming violence of action against those who deserve no mercy”..”
Dugang pa sang Santo Papa gikan sa isa ka dinalan sa Bibliya sa diin si hesus, antes ini gindakop kag gintalana nga ilansang sa krus, ang nagsaway sa isa sa iya nga sumulunod nga nagsumbag sa nagdakop sa iya.
