Posible pagtaas sang presyo sang bulak sa kapin P30 , lauman sa ulihe nga semana sang Oktubre

ROXAS CITY – Wala pa sang paghulag sa presyo sang bulak subong nga adlaw apang posible magataas ini sa P20-P30 sa ulihe nga semana sang Oktubre ukon humalin Oktubre 20 tubtob sa adlaw sang minatay.

Ini ang ginpahayag ni Bebeng dela Peña, tag-iya sang Bebeng Flowershop sang mainterview sang Bombo Radyo.

Ginsiling sini nga sa karon, nagapabilin sa P150 ang gamay nga bulak, P300 sa medium kag P500 naman sa daku apang nakadepende pa ini sa sahi sang bulak nga pagagamiton.

Suno kay dela Peña, ang pagtaas sang presyo sang bulak ang nakaba-se sa pagmahal sang ginakuhaan nila nga suplay sa Baguio, Cebu kag Cagayan.

Samtang, nagapasalamat man ini nga amat-amat na nakabawi ang ila negosyo matapos ang paghalug sang COVID-19 restrictions.