ROXAS CITY – Wala pa sang sigurado nga tagdaog sa ginabantayan nga eleksiyon sa posisyon sang National Chairman sang Philippine Councilors League(PCL).
Ini ang ginpabutyag ni PCL Capiz-Chapter President Mitchel John Patricio sa ma-interview sang Bombo Radyo Roxas.
Suno kay Patricio indi pa matumod ang magadaog sa tunga nanday Davao City Councilor Danilo Dayanghirang kag Polangui, Albay Councilor Jesciel Salceda bangud lunsay may mga supporters man ang duha.
Ginkumpirmar man sini nga bangud sa technical glitch nga natabo rason nga ginpaiway ang natalana nga piniliay kahapon nga adlaw.
Nagpamalibad man nga maghatag sang komento si Patricio angut sa ginaalegar vote buying kasunod sa ginpadala nga reklamo ni Dayanghirang.
Nahibaluan nga nagalab-ot sa 12mil ka mga konsehales sa bilog nga Pilipinas ang magapasakup sa nasambit nga pinili-ay sa diin 123 diri ang gikan sa probinsiya sang Capiz.
