Ginsigurado ni Presidente Ferdinand Marcos Jr., nga bangud siya ang nag-umpisa sang isyu sang pagpasabat sa mga indibidwal nga nangin-pulos sa kwarta sang mga pumuluyo kaangut sa maanomaliya nga flood control projects, siya man ang magatapos sini.
Hugot nga ginsiling sang Presidente nga wala siya sang espesyal nga pagtratar nga himuon sa mga indibidwal nga gin-isyuhan sang warrant of arrest sang Office of the Ombudsman.
Sang Biyernes, gin-anunsiyo sang Presidente nga kalakip si anay Rep. Zaldy Co kag 17 ka iban pa sa Department of Public Works and Highways kag Sunwest Corporation ang may yara sang warrant of arrest.
Suno sa Presidente, lauman sang publiko nga wala untat ang ginahimo nila nga imbestigasyon kag pagpasaka sang mga kaso base sa mga ebidensiya.
Kadungan sini, nagpasalamat naman ang Presidente sa pasensya sang publiko.
Iya ginsiling nga nagbunga nagid man ang amo nga mga pasensya.
Dugang pa niya, indi sang haka-haka kag indi sang istorya lang ang ginpagwa nga arrest warrant kundi base sa mga ebidensiya.
