PRESIDENT ROXAS, CAPIZ- Ginpatpat sang Hepe sang President Roxas Municipal Police Station ang mga accomplishments sang ila nga talatapan sa banwa sang President Roxas, Capiz halin Enero tubtob Agosto 2025.
Sa interview sang Bombo Radyo kay Police Major Alfred De Leon, Hepe sang President Roxas Municipal Police Station, iya ginpakigbahin ang mga accomplishments sang ila nga talatapan sa diin nga nagresulta sa pagpabilin sang palibot nga malinong kag matawhay.
Sa mga nanari-sari nga mga aktibidad nga ginpatigayon sang ila nga team, nakadakop sila sang pito (7) ka mga indibidwal nga naglapas sa Republic Act 9165 ukon ‘Comprehensive Dangerous Drugs Act of 2002’ pamaagi sa pagpatigayon sang mga operasyon, subong man, nakadakop ini sila sang tatlo (3) ka mga indibidwal sa paglapas sa Republic Act 10591 ukon ‘Comprehensive Firearms and Ammunition Regulation Act’. Samtang, nakadakop man sila sang mga indibidwal nagikan sa apat (4) ka mga operasyon sa “Illegal Logging”, kag apat (4) man ka mga operasyon ang napatigayon sa “Illegal Fishing”.
Dugang diri, nakadakop man sila sang duha (2) ka mga other wanted persons pamaagi sa pagserbe sang warrant of arrest. Yara naman sa 21 ka mga armas-luuthang ang narekober pamaagi man sa mga ginpatigayon nga mga operasyon.
Apang, pahayag ni De Leon, dako nga ginakabalk-an nila sa banwa amo ang kaso sang mga aksidente sa dalanon, sa diin suno sa iya, nagapadayon naman ang ila nga programa kag implementasyon sang Republic Act 4136 ukon ‘Land Transportation and Traffic Code’ agud mapahagan-hagan ang amo nga insidente.
Pag-abot sa sitwasyon sang seguridad sang banwa sang Pontevedra, yara sa maayos kag ordered nga kahimtangan ang banwa.
Bangud sa bulig kag suporta sang lokal nga gobyerno, mga barangay officials kag mga pumuluyo sang banwa, nagapabilin ang kalinong kag katawhay sa palibot.
Samtang, nagapadayon sa gihapon ang mga nagkalain-lain nga mga programa sang talatapan kaangay sang pagpanagtag sang mga informative pamphlets sa mga pumuluyo, pag-conduct sang symposium, kag baranggay visitation. Isa pagid ka programa ang sa karon nga ila ginapabaskog amo ang programa nga inisyatibo sang Philippine National Police nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone kag sa sulod sang lima ka minuto ila pagarespondehan.
Pahayag pa ni De Leon, pamaagi sa pagbinuligay sang mga otoridad, lokal nga gobyerno kag mga pumuluyo naagaresulta sa paging madinalag-on ang mga programa sang kapulisan.
Lauman naman suno sa iya nga magapadayon ang tanan nga mga aktibidad sang mga katapo sang President Roxas Municipal Police Station agud mapabilin ang kalinong kag katawhay sa palibot sang banwa.
Interviewed by Bombo Francis Biñas and Bombo Sunnie Mae Batencila
