ROXAS CITY – Dismayado ang tagdumalahan sang isa ka asosasyon, matapos mapaslawan nga madala sa listahan ang ila banwa nga mahatagan sang agricultural machinery.
Sa interview sang Bombo Radyo kay Rogelio Dumopoy Presidente sang Cogon Sur Farmers and Cooperative, ginpahayag sini nga ginpahibalo lamang siya sang iya mga kaangay presidente sa asosasyon nga may yara sang pagahiwaton nga turnover sang agricultural machinery sa farmers association sa probinsya sang Capiz.
Suno kay Dumopoy, dako ang iya kakibot sang mahibaluan nga wala madala ang ila asosasyon sa mahatagan sang nasambit nga makinarya bangud ang traktura na lamang ang kulang agud magamit na ang harvester nga una na nga ila nabaton ilabi na subong nga nagasugod na sa pagpakita sang senyales sang tag-ululan.
Mahibaluan nga yara sa 19 nga mga traktura ang iga-turn-over sa nagkalain-lain nga mga kabanwahan kung sa diin tinutuyo sini nga mabuligan ang mga mangunguma nga mas mapadasig ang ila pag-obra kag matupungan ang bag-o nga henerasyon.
Dako man ang pagpati ni Dumupoy nga pamulitika ang rason kung ngaman wala nadala ang ila asosasyon.
Matandaan una na nga nakabaton ang Cogon Sur Farmers and Cooperative sang harvester kag transplanter apang wala ini nagamit bangud wala ini sang gamiton nga pagakargahan sang harvester kag tubtob subong yara lamang ini nakagarahe sa ila puluy-an.
Bangud sini, dako kun tani ang iya pagpasalamat kung makakuha sang traktura bangud matigayon na nga magamit ang harvester kag mapuslan sang pumuluyo sa ila lugar.
