Nagtaas ang presyo sang balay sa Pilipinas humalin sang Abril tubtob Hunyo 2025 sandig sa data sang Bangko Sentral ng Pilipinas.
Suno sa Bangko Sentral ng Pilipinas, ang presyo sang mga panimalay sa pungsod ang nagsaka sang 7.5% ipaanggid sang nagligad nga tuig sa kaangay nga period.
Ginalantaw ini nga may gamay nga paghinay kun ipaanggid sa 7.6% nga pagtaas sang first quarter.
Apang kun ipaanggid sa una nga tatlo ka bulan sang 2025, nagtaas ang presyo sang 4.2%, mas madasig kun ipaanggid sang mga nagliligad.
Sa Metro Manila, nagsaka lamang ang 2.4% ang presyo sang balay kag nagnubo pa ini sang 3.6% kun ipaanggid sang nagligad nga quarter.
Sa guwa naman sang Metro Manila, nagsaka sang 11.5% ang presyo, mas madasig sa 3% nga pagsaka sa first quarter.
Samtang ang pinakadako nga pagtaas ang yara sa Greater Manila Area nga may 13.2% kag Metro Cebu nga may 11.5%.
Pahayag sang BSP, madamo na nga mga tawo subong ang naga-utang sang kwarta agud makabakal sang balay.
Ini sandig sa housing loans nga nagsaka sang 14.7% kun ipaanggid sang tinalikdan nga tuig sa diin ang biggest share sang loans ang napaguwa sa CALABARZON kag Metro Manila.
Nagapakita lamang ini suno sa BSP nga madamo na nga pamilya ang nagakonsidera sa pagbakal sang residential properties.
