ROXAS CITY – Ginkumpirmar sang Regional Director sang Department of Agriculture (DA) nga may yara sang pagbag-o sa presyo sang bugas kun sa din posible magataas ini sang P1.00 – P2.00 kada kilo sa bug-os nga Western Visayas.
Sa interview sang Bombo Radyo kay RD Remelyn Recoter sang DA – Region 6, suno diri ini ang tuga sang padayon nga gyera sang Russia kag Ukraine kun sa din apektado ang suplay sang produktong petrolyo, abono kag primary commodities.
Suno kay Recoter, bangud nagakinahanglan sang gatong ang makinarya nga ginagamit sa produksyon sang bugas nagataas man ang cost production sini.
Nagalaum man ini nga sa pagpungko kag pagpamuno ni President-elect Ferdinand “Bongbong” Marcos Jr. sa DA may pagabag-uhon ini nga polisiya kag magadihon sang tikang agud masolbar ang krisis nga ginapangatubang sang agrikultura.
Maayo man suno kay Recoter nga ginpangunahan sang presidente ang DA agud mapadasig ang pag implementar sang mga proyekto sa idalum sang nasambit nga talatapan sang gobyerno kag mahatagan sang nagakaigo nga ayuda ang mga mangunguma.
