May pagnubo sa presyo sang bugas sa Teodoro Arcenas Trade Center (TATC).
Suno kay Mr. Edilberto Cambe, Presidente sang Rice Retailers Association sa TATC, ang rason sang pagnubo sa presyo sang bugas bangud nagasugod na ang pagpanubo sang taripa sa 15% halin sa anay 35% sa idalom sang ginpapanaog nga Executive Order No. 62 sang gobyerno.
Pahayag sini nga nagnubo ang presyo sang bugas sa P3.00 kada kilo kun sa diin ang anay P53 nga kilo sang regular milled rice yara na sa karon sa P50 per kilo, ang well milled rice naman nga kun sang una mabakal sa P56 kada kilo subong P53 na ang kilo, samtang ang special rice naman kaangay sang Jasmin, Dinorado, Sinandomeng kag Princess Bea nga P58 kada kilo ang anay nga presyo apang sa karon yara na sa P55 kada kilo.
Dugang pa ni Cambe nga bastante ang suplay sang bugas sa probinsya apang mas madamo ang imported rice kun ikumparar sa local rice bangud man sang epekto sang El Niño sa pananom sang mga mangunguma.
Ginalauman man suno diri nga mangin tayuyon na ang pagnubo sa masunod pa nga mga binulan bangud sa pagsulod sang harvest season.
