Presyo sang gatong, liwat nga magasaka subong nga semana

Liwat nga magasaka ang presyo sang produktong petrolyo buwas nga adlaw, Hulyo 15, matapos ang duha ka asud-asod nga semana nga rollback, suno sa anunsyo sang oil industry sources.

Lauman nga magasaka sang P0.70 kada litro sa gasolina, P1.40 kada litro sa diesel, kag P0.80 kada litro sa kerosene.

Suno sa report, ang paghulag sang presyo sa pangkalibutanon nga merkado, kalakip ang mataas nga demand kag ginalauman nga pagnuboo sang produksyon sang langis sa U.S., ang nagduso sa pagtaas sang presyo subong nga semana.

Matandaan nga sadtong nakaligad nga semana nagpatuman sang rollback ang oil industry sources sa diin nagnubo sang P0.70 sa gasolina, P0.10 sa diesel, kag P0.80 sa kerosene.