Nagnubo ang presyo sang krudo sa pangkalinutanon nga merkado pagkatapos nga gin-anunsyo sang Iran nga “completely open” na ang Strait of Hormuz sa mga commercial ships nga nagaagi sa sini nga ruta.
Ang Brent crude nagnubo sa mga $88 kada bariles halin sa masobra $98 sang Sabado (oras sang Pilipinas).
Nahibaluan nga ang Strait of Hormuz isa ka importante nga ruta nga nagadala sang mga 20% sang langis kag liquefied natural gas sa kalibutan.
Suno sa Iranian Foreign Minister Abbas Araghchi, ang tanan nga commercial vessels mahimo mag-agi basta may yara sang ceasefire sa rehiyon.
Bilang resulta, ang mga merkado sang stock sa U.S. kag Europe, kon sa diin nagtaas ang S&P 500, Nasdaq, kag Dow Jones tubtob sa 1%, samtang ang mga merkado sa Europe pareho sang DAX sang Alemanya kag ang CAC sang Pransia nagtaas sang kapin sa 2%.
Matandaan nga ang presyo sang gatong nagtaas sang nagligad nga mga semana bangud sang tensyon sa tunga sang Iran kag Israel, nga nagalab-ot sa masobra $100 kada bariles kag kon kaisa nagasobra sa $119.
Sa pihak sang pagbukas sang ruta, nagapabilin nga mabinantayon ang pila ka mga shipping companies kag ginpahayag nga magahulat pa sila antes mag-agi sa lugar bangud sa security issues.
Samtang, ginpahayag naman sang pila ka mga analyst nga posible magapabilin nga volatile ang presyo sang langis samtang indi pa lubos nga estable ang sitwasyon sa rehiyon.
