ROXAS CITY – Ginakulang sa karon sa suplay sang softdrinks ang pila ka distributors sa syudad sang Roxas.
Ini ang suno kay City Councilor Moreno Altamia Gonzaga, isa sa mga distributor sang isa ka brand sang softdrinks sang mapakig-angutan sang Bombo Radyo.
Suno diri, indi bastante ang ila subong nga stocks nga ginakuha pa sa San Miguel, Iloilo nga amu ang nagasuplay sa bug-os nga Panay.
Ginpahayag sang konsehal nga in demand man ini bangud sa madamo subong ang nagabakal sa ila ilabi na ang may mga sari-sari store kag karenderya.
Dugang sini nga gintuad sang ila plant manager kag general manager ang rason sa pagnubo sang suplay bangud sa ginareproduce ukon gina-manufacture pa ang mga botelya, naglapad ang area sang ginadeliveran, kag sa iban pa nga pungsod ginakuha ang iban nga raw materials nga ginagamit sa paghimo sang softdrinks, wala naman sang mga ini ginsiling kun nag-apekto ang pagtaas sa presyo sang asukar.
Ginkumpirmar man ni konsehal Gonzaga nga sang tinalikdan nga bulan, nagpataas sila sang gamay sa presyo sang kada kaha sang ila softdrinks.
