ROXAS CITY – Ginpaidalom na sa autopsy examination ang bangkay sang public school principal nga si Jun Mencedez nga ginbuno-patay sa sulod mismo sang iya apartment sang iya kaupod sini nga nag-inom sa Green Earth Subdivision, Barangay Mongpong, Roxas City takna 1:55 sang kaaganhon kahapon, Agosto 16.
Ini ang ginkumpirmar ni PSMS Ramil Arcangeles, Information Officer sang Roxas City PNP sang mainterview sang Bombo Radyo.
Ginpahayag sang opisyal nga ang pamilya mismo sang biktima ang nag-request sa ila imbestigador nga ipaidalom sa autopsy ang ila himata kag ginhitsu naman ang request form sa Scene of the Crime Operations (SOCO) agud madeterminar ang mga patal nga pilas nga naagom sang biktima.
Suno diri, ginahulat nalang nila ang resulta sang nasambit nga eksaminasyon kag nagapadayon tubtob sa karon ang ila imbestigasyon agud magtipon sang mga testigo kag ebidensya angut sa krimen, nakuhaan naman sang statement ang ila kaupod nga nag-inom-inom nga nauna na nga nagpauli nga si Alvin Aniero.
Posible suno kay Arcangeles nga madugay na nga magkilalahay ang biktima, si Aniero kag ang suspetsado nga si Obarra.
Sa pihak nga bahin, natigayon nga madakpan kahapon sang hapon ang suspetsado nga ginkilala kay John Peter Obarra sa ila balay sa Barangay Balat-an Mambusao Capiz pinaagi sa hot pursuit operation sang mga kapulisan kag sa bulig ni Punong Barangay Renante Leonardo sang nasambit nga Barangay.
May yara naman sang anggulo nga ginalantaw ang kapulisan sa motibo sang suspek sa pagpatay sa biktima.
