ROXAS CITY – Mahimo makapatuman sang 4-day workweek ang mga private sector apisar wala sang direktiba sang presidente.
Ini ang ginpahayag ni Ms. Amy Judicpa, OIC sag Department of labor and Employment (DOLE) – Capiz, sang mainterview sang Bombo Radyo.
Suno diri, indi obligado ang mga private sector kag depende sa ila nga desisyon kun iga-emplement ang nasambit nga flexible work arrangements.
Kinahanglan lang sang mga ini nga magsumiter sang Memorandum of Agreement (MOA) sa tunga sang employer kag worker.
Kun matabo, mangin napulo ka oras kada adlaw ang iga-trabaho sang trabahante, kag indi makabig nga overtime pay ang dugang nga duha ka oras.
Sa monitoring sang DOLE-Capiz, wala pa sang pribado nga kompaniya ang nag-apply sang nasambit nga work arrangements sa probinsya.
Nagapati si Judicpa nga may bentaha kag disbentaha sa nagkalain-lain nga kompaniya, subong man sa empleyado ang pagpalawig sang oras kag sa pagpalip-ot sang inadlaw sang trabaho, gani kinahanglan ini nga planuhan.
Sa pihak nga bahin, ginkumpirmar man sini nga magatambong ang Comelec-Capiz sa patigayunon nga public hearing sa maabot nga Abril 11 ukon 13 sa Iloilo kag Aklan, angut sa pagtalakay sa petisyon nga ginpalab-ot sa Negros angut sa wage increase.
Nagalaum man ini nga mangin positibo ang resulta sang patigayunon nga public hearing, agud sa katapusan sang Abril magapaguwa na sang desisyon kun pataasan ang minimum wage sa Western Visayas.
