Ginbisita ni Police Brigadier General Randulf Tuaño, Acting Regional Director sang Police Regional Office 6 (PRO6), ang pila ka police stations sa Roxas City.
Ang pagbisita kabahin sang iya pagmonitor agud masiguro nga handa ang mga kapulisan sa pagserbisyo sa publiko kag nagasunod sa mataas nga istandard sang disiplina kag propesyonalismo.
Sa interview sang Bombo Radyo kay Tuaño, iya ginpapahayag nga kinahanglan magpabilin nga disiplinado, propesyonal kag dedikado sa serbisyo ang mga kapulisan sa tanan nga tion.
Ginhatagan man sini sang importansya ang pagpasangkad sang moral sang mga pulis kag paghatag sang dekalidad nga serbisyo publiko sa komunidad.
Isa sa mga highlight sang iya pagbisita amo ang “Talk to Team” session kun sa diin direkta siya nga nakapakig-istorya sa mga katapo sang kapulisan kag ginpabutyag sini ang importansya sang responsibilidad sang kada pulis sa pagmintinar sang kalinong kag katawhay sa komunidad, kag pagpreserbar sang integridad sang organisasyon.
