CAPIZ- Ginkumpirmar sang Capiz Provincial Government ang ila labing-una nga kaso sang Mpox (kilala anay nga Monkeypox), base sa opisyal nga resulta sang test gikan sa Research Institute for Tropical Medicine (RITM).
Sa interview sang Bombo Radyo kay Dr. Ramon Alex T. Nolasco, Provincial Health Officer II, Capiz una nga ginreport sang pito ka suspected cases sadtong Hunyo 17. Duha sa mga ini ang nagpaidalom sa Polymerase Chain Reaction (PCR) testing, sa diin ang isa ang nagguwa nga positibo kag ang isa naman ang nagguwa nga negatibo. Ang resulta ang ginpalab-ot pinaagi sa Department of Health – Western Visayas Center for Health Development (DOH-WV CHD).
Ang kumpirmado nga kaso ang yara na sa home isolation kag maid-id nga ginabantayan sang local health office.
Amat-amat naman nga naga-ayo ang skin lesion sang pasyente kag ang tanan nga idenfied close contacts ang padayon nga gina-assess kag gina-monitor.
Ang Provincial Health Office humalin sadto ginpabaskog ang pagbantay, monitoring, kag containment efforts sa koordinasyon sang 17 ka Local Health Offices (LHOs), lima ka ospital sang gobyerno, kag Barangay Health Emergency Response Teams (BHERTs) sa bug-os nga Capiz.
Ginapanugyanan ang publiko nga magpabilin nga kalmado, mabinantayon, kag mabinuligon. Hugot nga ginapahanumdom ang mga pumuluyo nga magsunod sa Minimum Public Health Standards (MPHS), nga nagalakip sang:
- Regular kag nagakaigo nga pagpanglimpyo sang kamot
- Pagsuksok sang face mask sa sirado ukon gutok nga mga lugar
- Pag-obserbar sang nagakaigo nga pamatasan sa pag-ubo kag pag-atras
- Paglikaw sa suod nga pagkontak sa mga indibidwal nga nagapakita sang mga sintomas pareho sang hilanat, mga rashes, ukon nagahubag nga mga lymph node
- Magpa-konsulta gilayon sa doktor kung magkabatyag sang mga sintomas
Ginpasalig man ni Governor Fredenil H. Castro ang mga Capiznon sa padayon nga pangako sang gobyerno sa pag-amlig sang ikaayong lawas kag kaluwasan sang publiko. Ang tanan nga opisyales nga updates kag advisories ang igapaguwa pinaagi sa CPG Communication Group kag sa mga official communication platforms sang Provincial Health Office.
