Probinsya sang Capiz, Makabig nga preparado sa tion nga magluntad ang mabaskog nga linog

Makabig nga preparado ang operations team sa Probinsya sang Capiz kun magluntad ang mabaskog nga linog.

Sa interview sang Bombo Radyo kay Engr. Reynaldo Antioquia, Science Research Analyst sang Philippine Institute of Volcanology and Seismology (PHIVOLCS) Capiz,  iya ginpahayag nga padayon sila nga naga-coordinate sa mga Local Government Unit agud masiguro nga regular nga gina-inspeksyon sa mga building.

Suno kay Antioquia, importante nga mapatuman sang mga instruksyon ang standard sa pagtukod sang mga building agud malikawan ang peligro sa tion sang linog.

Nagpahanumdom man ini sa publiko nga magpatisipar sa mga ginapatigayon nga earthquake drills para mangin handa kag luwas sa oras sang kalamidad kaangay sang linog.